fjola.net

Nýlega fór ég á námskeið á vegum 3.f - Félag um upplýsingatækni og menntun. Kennari var Salvör Gissurardóttir. Á námskeiðinu var kennt að nýta Wiki fjölfræðiorðabókina og skylda vefi í kennslu. Mér fannst allt sem kennt var einstaklega áhugavert og er viss um að ég á eftir að nýta mér eitthvað af því sem fram fór. Kennt verður áfram í fjarkennslu fram í nóvember svo ég ætla að reyna að vera dugleg að æfa mig á meðan aðstoðar nýtur við.

Í sumarfríi er upplagt að hafa eitthvað almennilegt að lesa. Sér í lagi ef maður liggur í sólbaði, en líka ef maður vill hafa eitthvað gott til þess að sofna út frá.

Nýlega fékk ég sendar upplýsingar um nýjar greinar á Netlu. Hafið ekki tíma til þess að líta á þær þá, en núna þegar fríið er byrjað er nógur tími. Það eru einkum tvær nýlegar greinar sem ég við benda á.

Grein S.Fjalars um Opnar lausnir. Frumherjar kallar Fjalar grein sína og er þessi grein sú fyrsta af þremur sem hann ætlar að birta um opnar lausnir. Ég er langt komin með að lesa greinina og get mælt með henni.

Svo er það grein eftir Guðlaugu Erlu og Magna um uppeldi til ábyrgðar. Ég hef áður lesið efni eftir Guðlaugu og fundist það áhugavert. Greinin er áhugaverð, ekki hvað síst vegna þess að ég dáist alltaf af fólki sem nennir að skrifa um hluti sem við erum að vinna við alla daga.