fjola.net

Dagana 9. til 13. janúar var hin árlega BETT sýning haldin í London. Þar var sem fyrr að finna allt sem viðkemur upplýsingatækni og menntun á öllum skólastigum. Ég slóst í hóp með um eitthundrað og sextíu manns á vegum Úrval Útsýn og Nýherja. Aldrei áður hefur svo fjölmennur hópur frá Íslandi sótt þessa sýningu.

Hér á eftir ætla ég að skýra frá því helsta sem vakti áhuga minn, en eins og áður þegar ég fjalla um BETT er það gert með augum leikskólasérkennarans.

Fyrir marga sem koma í fyrsta sinn á BETT virðist umfangið yfirdrifið, en um leið og fólk nær áttum er það ekki svo erfitt að rata um innviði Olympia í London.

Það vakti athygli mína þetta árið hvað sérkennslusvæðið hafði minnkað, en í ljós kom að ákvörðun hafði verið tekin um það að dreifa meira um sýningarsvæðið tæknibúnaði sem hentar til sérkennslu. Einnig var eins og undanfarin ár sérsýning á fyrstu hæð Hilton hótelsins í næsta nágrenni.
Þangað fór ég ásamt fleira fólki og vissulega var þar ágæt sýning en mjög einsleit. Aðallega var verið að sýna þar talvélar og búnað sem notaður er til óhefðbundinna tjáskipta. Þar verslaði ég nú reyndar talandi albúm og litla möppu fyrir Boardmaker myndir sem henta geta t.d. börunum sem ekki tala íslensku í leikskólanum.

Synergy Learning er alltaf á BETT og mér sýnist sem þeir séu að auka jafnt og þétt við kennslugögn á leikskólastigi. Ég heillaðist af stærðfræðigögnum þeirra og verslaði svolítið af þeim fyrir Furugrundina. Verslaði m.a. tening sem okkur hefur vantað lengi.  Hægt er að setja hvaða mynd sem er á hliðar teningsins, nota þá myndir úr Boardmaker eða Clicker. Mjög auðvelt er að versla kennslugögn á vef Synergy Learning, en svo er líka Skólavörubúðin með eitthvað af vörum frá þeim.

 ATPaK er fyrirtæki sem ég vissi ekki af. Þetta er fyrirtæki sem selur allskonar stæðrfræði- og vísindaverkefni.  Hægt er að versla hjá þeim tilbúin verkefni, en svo er líka hægt að nota vef þeirra sem uppsprettu hugmynda af verkefnum bæði í Clicker og Boardmaker.

PRI Liberator býður upp á margar tegundir rofa, talvéla og búnaðar til óhefðbundinna tjáskipta. Hægt er að versla beint á heimasíðunni og er úrvalið ótrúlega mikið hjá þeim.

 Direct Educational Services er með ógrynni af kennslugögnum sem henta mjög vel til notkunnar í leikskólum. Ég keypti einmitt stærðfræðispil af þeim mjög skemmtilegt.  Fyrirtækið er með nokkuð af áhöldum (skæri, liti o.fl.) sem henta börnum með sérþarfir.

Quality Enabling Devices Ltd er fyrirtæki sem selur margskonar tæknibúnað og kennslugögn fyrir hreyfihömluð börn. Mjög gaman að flakka um vef þeirra og mikið úrval hjá þeim af rofaboxum, rofum og allskonar skemmtilegum leikföngum sem hreyfihömluð börn geta stjórnað með rofum. Hér til hliðar er einmitt mynd af Go Talk One sem ég verslaði.

Fyrirtækið Experia er ég alltaf jafn heilluð af. Þeir eru að selja margskonar búnað til þess að búa til margmiðlunar-skynjunnar umhverfi. Alltaf eru að koma fram nýjungar á því sviði og frá því ég fór fyrst að vinna með slíkt umhverfi hafa bæst við margskonar tölvustýrð forrit til þess að vinna með. Hugsa sér hvað tæknin getur auðveldað kennurum og nemendum lífið . Man þegar við vorum að burðast með stórar óhentugar ljósavélar sem heyrðist svo hátt í að varla heyrðist í tónlistinni sem spiluð var. Nú er þetta allt tilbúið, bara skella í samband og tölvuforrit sér um að búa margmiðlunina til. Sannkölluð veisla fyrir skilningarvitin.  

 Leikjaforritið sem fylgir og styður við notkun Býflugunnar góðu fékk verðlaun á BETT. Langt síðan að við í Furugrund eignuðumst þetta forrit og líkar mjög vel. Við höfum einnig notað Býfluguna okkar mikið eins og sjá má. Hægt að mæla óhikað með henni og hægt er að versla hana beint á vefnum eða í Skólavörubúðinni.

 Noisy Things
Forrit sem fékk BETT verðlaunin í ár. Þetta er forrit með nokkrum viðfangsefnum þar sem tónlist og hljóð spila stórt hlutverk. Mér fannst þetta ekki forrit sem hentar í íslenskum leikskólum því það eru mjög pirrandi hljóð sem fylgja því og er ekki ábætandi við hávaðann sem fyrir er, því miður. Hægt er að panta forritið á vef framleiðandans Q&D Multimedia.  

Kynningarmyndband.

Ég heillaðist mjög af Espresso education  sem reyndar fékk Bett verðlaunin sem besti vefur með stafrænt efni. Við vorum orðnar þreyttar síðdegis og settumst því niður með því hugarfari að hvíla okkur, en sýnandinn sem var kona tókst að halda athygli okkar í 30.mínútur. Hún leiddi okkur inn í og út um heim allan. Algerlega frábært hvernig Bretarnir eru búnir að koma fyrir á kennsluvef öllu mögulegu gömlu og nýju myndefni sem notast sem fræðsluefni. Okkur var hugsað til íslenska kvikmyndasafnsins og myndasafns RÚV hvernig hægt væri að nýta það efni sem til er í kennslu. Sjón er sögu ríkari endilega lítið á. Einnig er hægt að skoða kynningarmyndband hér.